ഫിഫ ലോകകപ്പിൽ പുതിയ ചരിത്ര നേട്ടം സ്വന്തമാക്കിയ അർജന്റീന നായകൻ ലയണൽ മെസ്സിയെ അഭിനന്ദിച്ച് അന്താരാഷ്ട്ര ഫുട്ബോൾ ഫെഡറേഷൻ (FIFA) പങ്കുവെച്ച മലയാളം പോസ്റ്റ് തരംഗമാകുന്നു. ഓസ്ട്രേലിയക്കെതിരായ മത്സരത്തിൽ നേടിയ ഗോളോടെ ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടുന്ന താരം എന്ന റെക്കോർഡാണ് മെസ്സി സ്വന്തമാക്കിയത്.
ജർമ്മനിയുടെ മുൻ താരം മിറോസ്ലാവ് ക്ലോസെയുടെ 16 ഗോൾ എന്ന റെക്കോർഡ് മറികടന്നാണ് മെസ്സി തന്റെ 17-ാം ലോകകപ്പ് ഗോൾ സ്വന്തമാക്കിയത്. ഇതോടെ ലോകകപ്പ് ചരിത്രത്തിലെ എക്കാലത്തെയും മികച്ച ടോപ്പ് സ്കോററായി മെസ്സി മാറി. അൾജീരിയക്കെതിരായ മത്സരത്തിൽ നേടിയ ഹാട്രിക് ഗോളുകളോടെയാണ് മെസ്സി ക്ലോസെയ്ക്കൊപ്പം എത്തിയത്.
ഓസ്ട്രേലിയക്കെതിരായ മത്സരത്തിൽ മെസ്സി റെക്കോർഡ് ഗോൾ നേടിയ നീക്കത്തിൽ ഫൗൾ ഉണ്ടായതായി ആരോപണമുയർന്നിട്ടുണ്ട്. അർജന്റീന താരം അലക്സിസ് മാക് അലിസ്റ്റർ ഓസ്ട്രേലിയൻ താരം സേവ്യർ സ്ലാഗറെ ഫൗൾ ചെയ്ത് വീഴ്ത്തിയെങ്കിലും റഫറി ഫൗൾ വിളിക്കുകയോ വാർ (VAR) പരിശോധിക്കുകയോ ചെയ്തില്ലെന്നാണ് ആക്ഷേപം. ഇത് ഓസ്ട്രേലിയൻ ക്യാമ്പിൽ വലിയ പ്രതിഷേധത്തിന് ഇടയാക്കിയിട്ടുണ്ട്. കഴിഞ്ഞ ആഴ്ച അൾജീരിയക്കെതിരായ മത്സരത്തിൽ മെസ്സിക്ക് കാർഡ് നൽകാത്തതിനെതിരെ അൾജീരിയൻ ഫുട്ബോൾ ഫെഡറേഷനും ഫിഫയ്ക്ക് പരാതി നൽകിയിരുന്നു.
വിവാദങ്ങൾക്കിടയിലും മെസ്സിയുടെ റെക്കോർഡ് നേട്ടം ഫിഫ ഔദ്യോഗികമായി തന്നെ ആഘോഷമാക്കി. മെസ്സിയുടെ ഫോട്ടോയ്ക്കൊപ്പം "ഇവനെ പടച്ചു വിട്ട കടവുൾക്ക് പത്തിൽ പത്ത്" എന്ന മലയാളം വരികളോടെയാണ് ഫിഫ ഇൻസ്റ്റാഗ്രാമിൽ പോസ്റ്റ് പങ്കുവെച്ചത്. അടുത്തിടെ തിയേറ്ററുകളിൽ വലിയ വിജയമായി മാറിയ ഫഹദ് ഫാസിൽ ചിത്രം 'ആവേശം' സിനിമയിലെ ഗാനത്തിലെ വരികളാണിത്. ഫിഫയുടെ ഈ മലയാളം പോസ്റ്റ് മലയാളി ഫുട്ബോൾ പ്രേമികൾ വലിയ ആവേശത്തോടെയാണ് ഏറ്റെടുത്തിരിക്കുന്നത്.
