ഉപഭോക്താക്കൾ അറിഞ്ഞിരിക്കേണ്ട അഞ്ച് പ്രധാന മാറ്റങ്ങൾ താഴെ പറയുന്നവയാണ്:
1. നികുതി അടയ്ക്കാൻ ക്രെഡിറ്റ് കാർഡ്
ഇതുവരെ ആദായനികുതി അടയ്ക്കാൻ ഡെബിറ്റ് കാർഡുകളോ നെറ്റ് ബാങ്കിംഗോ ആണ് പ്രധാനമായും ഉപയോഗിച്ചിരുന്നത്. എന്നാൽ പുതിയ നിയമപ്രകാരം നികുതിദായകർക്ക് തങ്ങളുടെ ക്രെഡിറ്റ് കാർഡ് ഉപയോഗിച്ചും ഇൻകം ടാക്സ് അടയ്ക്കാം. കൈയ്യിൽ പണമില്ലാത്ത സാഹചര്യത്തിൽ നികുതി അടയ്ക്കാൻ ഇത് സൗകര്യപ്രദമാണെങ്കിലും, ക്രെഡിറ്റ് കാർഡിലെ ഉയർന്ന പലിശ നിരക്ക് ഉപഭോക്താക്കൾക്ക് വെല്ലുവിളിയായേക്കാം.
2. കമ്പനി കാർഡുകളുടെ വ്യക്തിഗത ഉപയോഗം
കമ്പനികൾ തങ്ങളുടെ ജീവനക്കാർക്ക് നൽകുന്ന ക്രെഡിറ്റ് കാർഡുകളുടെ ഉപയോഗത്തിൽ കർശന നിയന്ത്രണം വരും. കാർഡ് കമ്പനി ആവശ്യങ്ങൾക്കായി മാത്രമാണ് ഉപയോഗിക്കുന്നതെങ്കിൽ നികുതി ബാധകമല്ല. എന്നാൽ വ്യക്തിഗത ആവശ്യങ്ങൾക്കായി ഇത്തരം കാർഡുകൾ ഉപയോഗിച്ചാൽ, ചിലവാക്കുന്ന തുകയുടെ മൂല്യത്തിന്മേൽ ജീവനക്കാരൻ നികുതി നൽകേണ്ടി വരും.
3. പാൻ (PAN) നിർബന്ധം
പുതിയ ക്രെഡിറ്റ് കാർഡുകൾക്കായി അപേക്ഷിക്കുമ്പോൾ ഇനി പാൻ കാർഡ് നിർബന്ധമാണ്. സാമ്പത്തിക വിവരങ്ങൾ ആദായനികുതി വകുപ്പിന്റെ സിസ്റ്റവുമായി എളുപ്പത്തിൽ ബന്ധിപ്പിക്കുന്നതിനാണ് ഈ നടപടി. പാൻ കാർഡ് ഇല്ലാത്തവർക്ക് ബാങ്കുകളിൽ നിന്നോ മറ്റ് സ്ഥാപനങ്ങളിൽ നിന്നോ ക്രെഡിറ്റ് കാർഡ് ലഭിക്കില്ല.
4. വിലാസം തെളിയിക്കാൻ സ്റ്റേറ്റ്മെന്റ്
ഔദ്യോഗിക ആവശ്യങ്ങൾക്കായി മേൽവിലാസം തെളിയിക്കുന്ന രേഖയായി (Address Proof) ഇനി ക്രെഡിറ്റ് കാർഡ് സ്റ്റേറ്റ്മെന്റുകൾ ഉപയോഗിക്കാം. എന്നാൽ ഈ സ്റ്റേറ്റ്മെന്റ് മൂന്ന് മാസത്തിൽ കൂടുതൽ പഴക്കമുള്ളതാകാൻ പാടില്ല എന്ന നിബന്ധനയുണ്ട്.
5. ഒരു ലക്ഷത്തിന് മുകളിലുള്ള ഇടപാടുകൾ നിരീക്ഷണത്തിൽ
ക്രെഡിറ്റ് കാർഡ് ഉപഭോക്താക്കളെ ബാധിക്കുന്ന ഏറ്റവും പ്രധാനപ്പെട്ട മാറ്റമാണിത്. ഒരു സാമ്പത്തിക വർഷത്തിൽ ഒരു ലക്ഷം രൂപയോ അതിലധികമോ തുക ക്രെഡിറ്റ് കാർഡ് ബില്ലായി അടയ്ക്കുന്നുണ്ടെങ്കിൽ, ആ വിവരം ബാങ്കുകൾ ആദായനികുതി വകുപ്പിനെ അറിയിക്കും. നികുതിദായകരുടെ വരുമാനവും ചെലവും തമ്മിൽ പൊരുത്തപ്പെടുന്നുണ്ടോ എന്ന് നിരീക്ഷിക്കുന്നതിനാണ് ഈ കർശന നീക്കം.
ക്രെഡിറ്റ് കാർഡ് ഇടപാടുകൾ കൂടുതൽ സുതാര്യമാക്കാനും നികുതി വെട്ടിപ്പ് തടയാനും പുതിയ നിയമങ്ങൾ സഹായിക്കുമെന്നാണ് സർക്കാർ വിലയിരുത്തുന്നത്. 2026 ഏപ്രിൽ മുതൽ ഈ മാറ്റങ്ങൾ പ്രാബല്യത്തിൽ വരുമെന്നാണ് റിപ്പോർട്ടുകൾ.