ഡൽഹിയിലെ നീണ്ട ചർച്ചകൾക്ക് ശേഷം താൻ അതീവ ക്ഷീണിതനാണെന്നും ഇപ്പോൾ കൂടുതൽ പ്രതികരണങ്ങൾക്കില്ലെന്നും സുധാകരൻ വ്യക്തമാക്കി. സ്ഥാനാർത്ഥി പട്ടികയുമായി ബന്ധപ്പെട്ട് ഉയർന്ന തർക്കങ്ങളിലും അസംതൃപ്തിയിലും ദേശീയ നേതൃത്വം നേരിട്ട് ഇടപെട്ട സാഹചര്യത്തിലായിരുന്നു സുധാകരന്റെ ഡൽഹി യാത്ര. മല്ലികാർജുൻ ഖാർഗെയുമായുള്ള കൂടിക്കാഴ്ചയിൽ സുധാകരനെ അനുനയിപ്പിക്കാൻ ഹൈക്കമാൻഡിന് സാധിച്ചതായാണ് സൂചനകൾ. വിമാനത്താവളത്തിൽ നിന്ന് അദ്ദേഹം നേരിട്ട് വീട്ടിലേക്ക് തിരിച്ചു.
സ്ഥാനാർത്ഥി നിർണ്ണയവുമായി ബന്ധപ്പെട്ട് സംസ്ഥാന കോൺഗ്രസിനുള്ളിൽ ഉടലെടുത്ത ഭിന്നതകൾ പരിഹരിക്കാനാണ് എഐസിസി അധ്യക്ഷൻ നേരിട്ട് ഇടപെട്ടത്. സുധാകരന്റെ മടക്കയാത്ര ദേശീയ നേതൃത്വത്തിന്റെ നിർദ്ദേശപ്രകാരമായിരുന്നു. സ്ഥാനാർത്ഥി പട്ടിക പുറത്തുവന്നതിന് പിന്നാലെ പാർട്ടിക്കുള്ളിലുണ്ടായ അതൃപ്തികൾ പരിഹരിക്കാൻ സുധാകരൻ വരും ദിവസങ്ങളിൽ സജീവമാകുമെന്നാണ് പ്രതീക്ഷിക്കുന്നത്. പത്രികാ സമർപ്പണത്തിന് ഇനി ദിവസങ്ങൾ മാത്രം ബാക്കി നിൽക്കെ, സുധാകരന്റെ മടങ്ങിവരവ് പാർട്ടി അണികൾക്കിടയിൽ വലിയ ചർച്ചയായിട്ടുണ്ട്.