ശബരിമല സ്വർണ്ണക്കവർച്ചാ കേസിൽ ഒന്നാം പ്രതിയായ ഉണ്ണികൃഷ്ണൻ പോറ്റിയുടെ ജാമ്യാപേക്ഷ ഇന്ന് കൊല്ലം വിജിലൻസ് കോടതി പരിഗണിക്കും. റിമാൻഡ് കാലാവധി 90 ദിവസം പൂർത്തിയായിട്ടും പ്രത്യേക അന്വേഷണ സംഘത്തിന് (എസ്.ഐ.ടി) ഇതുവരെ കുറ്റപത്രം സമർപ്പിക്കാൻ കഴിയാത്ത സാഹചര്യത്തിലാണ് പോറ്റി സ്വാഭാവിക ജാമ്യത്തിനായി കോടതിയെ സമീപിച്ചത്.
നേരത്തെ, സ്വർണ്ണക്കവർച്ചയുമായി ബന്ധപ്പെട്ട ദ്വാരപാലക കേസിൽ ഉണ്ണികൃഷ്ണൻ പോറ്റിക്ക് ജാമ്യം ലഭിച്ചിരുന്നു. എന്നാൽ, കട്ടളപ്പാളി കേസിൽ ജാമ്യം ലഭിക്കാത്തതിനാൽ അദ്ദേഹം ജയിലിൽ തുടരുകയായിരുന്നു. ഇന്ന് പരിഗണിക്കുന്ന ഹർജിയിൽ ജാമ്യം ലഭിച്ചാൽ പോറ്റിക്ക് പുറത്തിറങ്ങാൻ സാധിക്കും.
ഉണ്ണികൃഷ്ണൻ പോറ്റിയെ കൂടാതെ, കേസിലെ മറ്റ് പ്രതികളും ഇന്ന് ജാമ്യാപേക്ഷയുമായി കോടതിയെ സമീപിക്കുന്നുണ്ട്.
മുൻ എക്സിക്യൂട്ടീവ് അംഗം സുധീഷ് കുമാറിന്റെ ജാമ്യാപേക്ഷ ഇന്ന് പരിഗണിക്കും.
ദ്വാരപാലക കേസിൽ തന്ത്രി കണ്ടര രാജീവരുടെ ജാമ്യാപേക്ഷയും ഇന്ന് കോടതിക്ക് മുന്നിലുണ്ട്.
കേസിലെ മറ്റൊരു പ്രതിയായ മുരാരി ബാബു നേരത്തെ ജാമ്യം നേടി പുറത്തിറങ്ങിയിരുന്നു.
അന്വേഷണം ആരംഭിച്ച് 90 ദിവസം പിന്നിട്ടിട്ടും കുറ്റപത്രം സമർപ്പിക്കാത്തത് എസ്.ഐ.ടിക്ക് വലിയ തിരിച്ചടിയായാണ് വിലയിരുത്തപ്പെടുന്നത്. സ്വാഭാവിക ജാമ്യത്തിന് പ്രതികൾക്ക് അർഹതയുണ്ടെന്ന സാഹചര്യം നിലനിൽക്കുന്നതിനാൽ, അന്വേഷണ സംഘത്തിന് കോടതിയിൽ നിന്ന് വിമർശനം നേരിടേണ്ടി വന്നേക്കാം.
നേരത്തെ എൻ. വാസു, കെ.പി. ശങ്കരദാസ്, സുദീഷ് കുമാർ എന്നിവർ ജാമ്യത്തിനായി സുപ്രീം കോടതിയെ സമീപിച്ചപ്പോൾ, സ്വർണ്ണക്കവർച്ച നടന്ന സമയത്തെ ദേവസ്വം എക്സിക്യൂട്ടീവ് അംഗങ്ങൾക്കും കമ്മീഷണർക്കും ഉത്തരവാദിത്തത്തിൽ നിന്ന് ഒഴിഞ്ഞുമാറാൻ കഴിയില്ലെന്ന് കോടതി വ്യക്തമാക്കിയിരുന്നു. മേൽക്കോടതികളുടെ നിർദ്ദേശപ്രകാരമാണ് പ്രതികൾ ഇപ്പോൾ കൊല്ലം വിജിലൻസ് കോടതിയെ സമീപിച്ചിരിക്കുന്നത്. ഉണ്ണികൃഷ്ണൻ പോറ്റിക്ക് ഇന്ന് ജാമ്യം ലഭിക്കുകയാണെങ്കിൽ, കേസിൽ ജയിൽ മോചിതനാകുന്ന രണ്ടാമത്തെ വ്യക്തിയായിരിക്കും അദ്ദേഹം.
