നിങ്ങൾ ആദായനികുതി റിട്ടേൺ (ITR) ഫയൽ ചെയ്യുന്നവരാണോ? എങ്കിൽ ഈ വാർത്ത ശ്രദ്ധിക്കുക. തെറ്റായ കിഴിവുകൾ (deductions) അവകാശപ്പെടുകയോ വരുമാനം മറച്ചുവെക്കുകയോ ചെയ്താൽ ഇനി കനത്ത പിഴ ഈടാക്കാനാണ് ആദായനികുതി വകുപ്പിന്റെ തീരുമാനം.നിയമലംഘകർക്ക് അടയ്‌ക്കേണ്ടി വരുന്ന നികുതിയുടെ 200% വരെ പിഴ, വർഷം 24% പലിശ, എന്തിന് സെക്ഷൻ 276C പ്രകാരം പ്രോസിക്യൂഷൻ നടപടികൾ വരെ നേരിടേണ്ടി വന്നേക്കാം. നികുതി അടക്കുന്നതിൽ കൃത്യതയും അനുസരണയും ഉറപ്പാക്കാനാണ് ഈ പുതിയ നീക്കം. അതിനാൽ, റിട്ടേൺ ഫയൽ ചെയ്യുമ്പോൾ വളരെ ശ്രദ്ധിക്കണം.
ഒരു പ്രധാന കാര്യം, നിങ്ങളുടെ ചാർട്ടേഡ് അക്കൗണ്ടന്റ് (CA) അല്ലെങ്കിൽ കൺസൾട്ടന്റ് തെറ്റ് വരുത്തിയാലും അതിന്റെ പൂർണ്ണ ഉത്തരവാദിത്തം നിങ്ങൾക്കായിരിക്കും. നിയമം നികുതദായകനെയാണ് ഉത്തരവാദിയായി കാണുന്നത്, റിട്ടേൺ തയ്യാറാക്കിയ വ്യക്തിയെയല്ല. അതുകൊണ്ട് തന്നെ, റിട്ടേൺ ഫയൽ ചെയ്യുമ്പോൾ ഓരോ കാര്യവും ഉറപ്പുവരുത്തേണ്ടത് അത്യാവശ്യമാണ്.ഈ പുതിയ നിയമങ്ങൾ ശമ്പളക്കാർ, ഫ്രീലാൻസർമാർ, പ്രൊഫഷണലുകൾ, ബിസിനസുകാർ എന്നിങ്ങനെ എല്ലാത്തരം നികുതദായകർക്കും ഒരുപോലെ ബാധകമാണ്. തെറ്റായ റിപ്പോർട്ടിംഗ് തടയുകയും എല്ലാ വരുമാന സ്രോതസ്സുകളും കൃത്യമായി വെളിപ്പെടുത്തുന്നുവെന്ന് ഉറപ്പാക്കുകയുമാണ് ലക്ഷ്യം.
സാധാരണയായി സംഭവിക്കുന്ന തെറ്റുകൾ, അതായത് തെറ്റായ ITR ഫോം തിരഞ്ഞെടുക്കുക, കൃത്യമായ തെളിവുകളില്ലാതെ കിഴിവുകൾ അവകാശപ്പെടുക, മറ്റ് വരുമാനങ്ങൾ റിപ്പോർട്ട് ചെയ്യാതിരിക്കുക എന്നിവ പിഴയ്ക്ക് കാരണമായേക്കാം. ഇനി, നിങ്ങൾ തെറ്റായ വിവരങ്ങൾ നൽകിയതായി വകുപ്പ് കണ്ടെത്തിയാൽ, പിന്നീട് റിട്ടേൺ പുതുക്കി നൽകിയാലും പിഴയിൽ നിന്ന് ഒഴിവാകാൻ സാധ്യതയില്ല. തുടക്കം മുതലേ കൃത്യത ഉറപ്പാക്കുക എന്നതാണ് പ്രധാനം.
ഈ പിഴകൾ ഒഴിവാക്കാൻ എന്തുചെയ്യണം?
നിങ്ങളുടെ വരുമാന വിവരങ്ങൾ വാർഷിക വിവര സ്റ്റേറ്റ്‌മെന്റുമായി (Annual Information Statement - AIS) ഒത്തുപോകുന്നുണ്ടെന്ന് ഉറപ്പാക്കുക. എല്ലാ കിഴിവുകൾക്കും കൃത്യമായ തെളിവുകൾ സൂക്ഷിക്കുക. വൈകി ഫയൽ ചെയ്യുന്നത് ഒഴിവാക്കാൻ സമയപരിധി ശ്രദ്ധിക്കുക. കൂടാതെ, കൃത്യമായ രേഖകൾ സൂക്ഷിക്കുന്നത് ഓഡിറ്റ് സമയത്ത് നിങ്ങളെ സഹായിക്കും.
നിങ്ങളുടെ നിയമപരമായ നിലയും വരുമാനത്തിന്റെ സങ്കീർണ്ണതയും അനുസരിച്ച് ശരിയായ ITR ഫോം തിരഞ്ഞെടുക്കേണ്ടത് വളരെ പ്രധാനമാണ്. ITR-1 (സഹജ്) പോലുള്ള ലളിതമായ വരുമാനക്കാർക്കുള്ള ഫോമുകൾ മുതൽ ITR-7 പോലുള്ള പ്രത്യേക സ്ഥാപനങ്ങൾക്കുള്ള ഫോമുകൾ വരെ ലഭ്യമാണ്. തെറ്റായ ഫോം തിരഞ്ഞെടുത്താൽ റിട്ടേൺ അസാധുവാകാനും പിഴ വരാനും സാധ്യതയുണ്ട്.
വ്യക്തിഗത ചെലവുകൾ ബിസിനസ് ചെലവുകളായി തെറ്റായി കാണിക്കുക, കൃത്യമായ രേഖകളില്ലാതെ വ്യാജ വീട്ടുവാടക അലവൻസ് (HRA) ക്ലെയിം ചെയ്യുക തുടങ്ങിയ തെറ്റുകൾ വലിയ സാമ്പത്തിക പിഴകളിലേക്ക് നയിച്ചേക്കാം. നിങ്ങളുടെ ക്ലെയിമുകളെ സാധൂകരിക്കുന്നതിന് കൃത്യമായ രേഖകൾ സൂക്ഷിക്കാൻ ശ്രദ്ധിക്കുക.
ഈ പുതിയ മാറ്റങ്ങളുടെ പശ്ചാത്തലത്തിൽ, ITR ഫയൽ ചെയ്യുന്നതിന് മുമ്പ് പ്രൊഫഷണലുകളുമായി ആലോചിക്കുന്നതും എല്ലാ വിവരങ്ങളും പരിശോധിക്കുന്നതും നല്ലതാണ്. നികുതി നിയമങ്ങളിലെ മാറ്റങ്ങളെക്കുറിച്ച് അറിഞ്ഞിരിക്കുന്നതും വിദഗ്ധരുടെ ഉപദേശം തേടുന്നതും നികുതി ഫയലിംഗിലെ സങ്കീർണ്ണതകൾ ഒഴിവാക്കാൻ സഹായിക്കും. അതിനാൽ, ആദായനികുതി റിട്ടേൺ ഫയൽ ചെയ്യുമ്പോൾ കൂടുതൽ ജാഗ്രത പുലർത്തുക, നിയമങ്ങൾ കൃത്യമായി പാലിക്കുക.
