കോഴിക്കോട് ഏഴുവയസുകാരനെ തട്ടിക്കൊണ്ടുപോകാൻ ശ്രമം; രണ്ട് മംഗലാപുരം സ്വദേശികൾ പിടിയിൽ

കോഴിക്കോട്: 7 വയസുകാരനെ ചാക്കിൽ കയറ്റി തട്ടിക്കൊണ്ടുപോകാൻ ശ്രമിച്ചതായി പരാതി. കോഴിക്കോട് പുതിയകടവ് ബീച്ചിന് സമീപത്താണ് സംഭവം. ബേപ്പൂർ സ്വദേശിയായ ഷാജിറിന്‍റെയും അനുഷയുടെയും മകനെയാണ് തട്ടിക്കൊണ്ടു പോകാൻ ശ്രമിച്ചത്. സംഭവത്തിൽ 2 കർണാടക സ്വദേശികളെ പൊലീസ് കസ്റ്റഡിയിലെടുത്തു. കർണാടക സ്വദേശികളായ ഒരു പുരുഷനെയും സ്ത്രീയെയുമാണ് പൊലീസ് കസ്റ്റഡിയിലെടുത്തത്.വീടിനു സമീപത്തു നിന്നും സംസാരിക്കുന്നതിനിടെ 7 വയസുകാരനെ പൊക്കിയെടുത്ത് ചാക്കിൽ കയറ്റാൻ ശ്രമിച്ചെന്നും ബഹളം വച്ചതോടെ കുട്ടിയെ താഴെയിട്ട് ഓടിയെന്നുമാണ് 7 വയസുകാരന്‍റെ ഒപ്പമുണ്ടായിരുന്ന കുട്ടികൾ പറ‍യുന്നത്.ഇവരുടെ പിന്നാലെ ബീച്ചിലേക്ക് ഓടിയ കുട്ടികൾ അവിടെയുണ്ടായിരുന്ന ആളുകളോട് വിവരം പറ‍യുകയും ആളുകൾ ചേർന്ന് ഇരുവരെയും പിടികൂടി തടഞ്ഞുവയ്ക്കുകയായിരുന്നു. പിന്നീട് പൊലീസ് സംഭവസ്ഥലത്തെത്തി ചേർന്നാണ് ഇരുവരെയും കസ്റ്റഡിയിലെടുത്തത്. കുട്ടികളെ തട്ടിക്കൊണ്ടുപോകാൻ ശ്രമിച്ചവർ‌ക്കെതിരേ നടപടി സ്വീകരിക്കണമെന്ന് നാട്ടുകാർ പറഞ്ഞു.